Reiðtúr

Í gær fór Gísli ásamt Guðjóni yngri, finnsku stelpunum, pabba sínum, systur og frænku í heljarinnar útreiðatúr. Riðið var frá Lækjarbug upp með Hítaránni að Grettisbæli og vestur með Fagraskógarfjalli að Kaldármelum, þaðan til Flesjustaða og svo heim. Ástæðan fyrir því að þessi reiðleið var valinn var að Kolhreppingar voru að smala hjá sér í gær. Þegar þau nálguðust Kaldármela hittu þau leitarmenn með allt fjársafnið. Anni og Elisa voru yfir sig hrifnar og áttu ekki til orð til að lýsa hrifningu sinni. Þær höfðu aldrei séð annað eins magn af fé og hestafólki áður. Þrátt fyrir mikla úrkomu létu þær bleytuna ekki hafa áhrif á sig og stóðu sig mjög vel. Guðjón minn er að mínu mati hetja gærdagsins. Hann reið alla leið frá Lækjarbug að Kaldármelum sem mér finnst nú bara alveg frábært afrek miðað við hálfleiðinlegt veður. Reyndar var hann mjög þreyttur þegar ég kom og sótti hann. Hann borðaði og borðaði sem aldrei fyrr, skellti sér svo í heitt bað og var hinn sprækasti fram eftir kvöldi.

 

Athugasemdir

[Guðrún (IP-tala skráð) 11.9.2007 kl. 18:17]

Hann Guðjón á sko allan heiður skilinn. Það var bara virkilega ógeðslegt veður en alla leiðina reið hann eins og hershöfðingi, fremstur í flokki. Greinilega efni. En hvað ætli hann hafi verið lengi á baki? Áreiðanlega hátt í fjóra tíma.

[Ingunn (IP-tala skráð) 12.9.2007 kl. 17:50]

Já ég er alveg hjartanlega sammála þér. Mér skilst að hann ætli að ríða með okkur inn að fjalli á sunnudag. Eruð þið mæðgur klárar í slaginn?

p.s. mér skilst að veðurspáin sé okkur hliðholl